Втор ден кампања, партиите на митинзи и средби со граѓани

Партиите, коалициите и независните кандидати кои учествуваат на локалните избори што треба да се одржат на 15 октомври годинава, денеска, на вториот ден од 20-дневната изборна кампања ќе одржат митинзи и средби со граѓани низ повеќе градови и населени места.

Коалицијата „Живот во Македонија“ предводена од СДСМ вечерва централен митинг ќе одржи во Гевгелија. Претходно митинзи ќе одржи и во Дојран, Валандово и Богданци.

Коалицијата „За подобра Македонија“ предводена од ВМРО-ДПМНЕ има закажано митинзи во Виница и Кочани, а претходно ќе ги посети населените места Чешиново – Облешево и Зрновци.

Според агендата, Демократската унија за интеграција вечерва ќе одржи митинзи во Пласница, Дебреште и во Црнилиште.

ДПА пак митинг ќе одржи во Житоше, општина Долнени.

Од Алијансата за Албанците (НДП – УНИТЕТИ) за денеска најавија дека ќе отворat изборен штаб во село Чајле, гостиварско, во присуство на кандидатот за градоначалник на Гостивар, Шпат Исеини.

Кампањата за првиот изборен круг завршува на 13 октомври во 24 часот.

Шестите локални избори во Македонија се закажани за 15 октомври, а ќе се спроведуваат на 3.480 избирачки места во 80 општини и во Градот Скопје.

Вториот круг од изборите е закажан две недели подоцна, на 29 октомври. Изборната кампања за вториот круг завршува на 27 октомври во 24 часот.

До Агенцијата за вработување досега поднесени 816 барања од стечајни работници

До Агенцијата за вработување до денес се пристигнати 816 барања од стечајни работници за исплата на надоместок согласно неодамна донесениот Закон за материјално обезбедување на невработени лица поради приватизација на претпријатијата со доминантна државна сопственост.

Директорката на Агенцијата за вработување, Билјана Јовановска, денеска на прес-конференција соопшти дека досега не е донесено ниту едно решение, бидејќи се уште во тек е аплицирањето.

Рокот за поднесување на барањата е една година, а барањата се поднесуваат електронски. Стечајните работници треба да понесат само лична карта за идентификација, а останатите документи Агенцијата ќе ги обезбеди по службена должност. Доколку барањето не може да се поднесе електронски, стечајните работници тоа може да го сторат во архивата на центрите за вработување.

– Олеснување во овој закон е тоа што не е потребно стажот да биде платен. Доволно е лицата да биле во работен однос, односно како доказ во прилог на барањето се само М1 и М2 обрасците, појасни Јовановска.

На прес-конференцијата, на која присуствуваше и претседателката на здружението на стечајни работници УНИТ, Лилјана Ѓорѓиевска беше посочено дека околу 300 до 400 стечајни работници на ниво на државата не ги исполнуваат условите за добивање надоместок, односно немаат доволно години работен стаж.

– Тоа е најголем проблем затоа што знаеме дека раната транзиција од 90-тите години на некои не им дозволи да имаат 15 години работен стаж во државна фирма. Тоа е многу мала бројка на ниво на држава, рече Ѓорѓиевска, додавајќи дека ќе се бара решение и овие лица да бидат обештетени.

Со законот за стечајните работници се очекува околу 3.500 лица да добиваат месечен надомест во висина од 34 проценти од просечната исплатена месечна нето плата од минатата година, односно по 7.596 денари. За оваа намена со ребалансот на Буџетот веќе се обезбедени дополнителни средства и директорката на Агенцијата за вработување најави дека надоместокот ќе биде редовно исплаќан.

Надоместот може да го користат невработени на возраст од најмалку 52 години (жени) и 55 години (мажи) со најмалку 15 години стаж во претпријатија со доминантна сопственост на државата, а таму работниот однос да им престанал по основ на стечај, ликвидација или технолошки вишок, заклучно со 30 јуни годинава.

Законот за стечајни работници стапи во сила на 20 овој месец, а ден претходно беше донесен од страна на Собранието на Република Македонија.

Кривична пријава за директорка на училиште за злоупотреба на службената положба

Секторот за внатрешни работи Куманово поднесе кривична пријава против Д.С. (37) поради постоење основи на сомнение дека сторила кривично дело „злоупотреба на службена положба и овластување“.

Како што информира МВР, пријавената, како директор во општинското основно училиште „Светозар Марковиќ“ во село Старо Нагоричане, во текот на 2015 и 2016 година, по спроведена постапка по Јавен оглас за пополнување на работни места и избор на наставник во училиштето, дала изјава дека оштетениот наставник работи повеќе од две години и дека ги исполнува условите за трансформирање на работниот однос. Училишниот одбор, исто така, изгласал мислење со кое било одлучено за наставник да биде примен оштетениот кандидат.

– Пријавената не го испочитувала мислењето на Училишниот одбор и ја прекршила нејзината изјава и незаконски донела Решение со кое што го поништила спроведениот испит, потребен како услов по огласот. На кандидатка која не го положила испитот, по втор пат и овозможила да го полага и да го положи испитот. Потоа со Одлука го избрала токму тој кандидат како најуспешен. Неправилностите и незаконски овозможеното повторено тестирање биле констатирани и на Записник при извршен инспекциски надзор од Државниот просветен инспекторат на Република Македонија, кој со Решение ја поништил постапката за избор на наставник, соопшти МВР.

На пријавената, се додава во соопштението, и било наредено да ги отстрани наведените недостатоци.

– На повторениот Јавен оглас во 2016 година, на кој повторно се пријавиле истите кандидати, пријавената наместо да постапи по наредбата на Државниот просветен инспекторат на и да ја отстрани незаконитоста, повторно не ја извршила својата службена должност. Таа повторно донела Одлука со која го избрала претходно избраниот кандидат и со истата склучила Договор за вработување на определено време до 31.08.2016 година. Со тоа на оштетениот кандидат и нанела материјална штета за повеќекратен износ од 19.500 денари како месечна основна нето плата за наведеното работно место, зголемен за точно неутврден износ по основ на придонеси за минат труд и задолжитено осигурување, се потенцира во соопштението од МВР.

Неопходно социјално партнерство за програмите за превенција на ХИВ

Ако Македонија сака одржлив систем на која било програма за ранлива група на граѓани тоа може да го направи само преку социјално партнерство и никако поинаку, бидејќи државата е гломазен субјект, а граѓанскиот сектор кој е веќе подготвен треба само да биде ставен во соодветна функција, изјави денеска министерката за труд и социјална политика Мила Царовска.

– Треба да изградиме пристап што ќе значи пристап утврдување цена на чинење на секоја една услуга која државата ја плаќа преку социјално партнерство. Можеме да финансираме и бизнис и граѓански сектор, но затоа е потребно регистер, стандарди, па потоа утврдување на цена на чинење, изјави Царовска на отворањето на конференцијата „Модели за финансирање на програмите за превенција на ХИВ и намалување на штети од употреба на дроги“, во организација на ХОПС – опции за здрав живот.

Посочи дека ако системот на давање услуги зависи од политичка волја, тогаш тоа не е одржлив систем, но доколку се изнајде соодветен систем истиот тој може да се реплицира и за други програми.

Извршниот директор на ХОПС Христијан Јанкулоски посочи дека Македонија е земја со најниска преваленца на ХИВ во регионот на ЈИЕ и дека изминатите 20 години се изградени сите капацитети кои можат да дадат одговор на ХИВ епидемија и само е потребна поддршка на истите и во иднина.

– На 5 септември 2017 година Владата на Република Македонија усвои одлука со која од 2018 година се обезбедуваат 103 милиони денари од националниот Буџет за превенција и третман на ХИВ. Се уште остануваат предизвиците. Мора да постои повеќегодишен план за имплементација со минимален едногодишен план за финансирање, рече Јанкулоски.

Нагласи дека во Македонија овие сервиси ги имплементираат 15 здруженија во 15 градови, а услуги од нив на секојдневна основа во нивните центри и на терен добиваат 15 илјади лица.

Договорена соработка меѓу поштите на Македонија и на Словенија

Македонска  пошта и Словенечка пошта потпишаа меморандум за соработка. Меморандумот предвидува користење на искуствата од Словенечка пошта за иден развој на Македонска пошта.

Договорено е приоритет да биде користењето на ИТМ апликацијата на Словенечка пошта за царинење на поштенски пратки од страна на Mакедонска пошта.

Апликацијата ќе го поедностави процесот на царинење на поштенски пратки од интернет нарачки, што ќе значи големо олеснување за работата на Македонска пошта и Царинската управа на Македонија.

Во соопштението од Македонска пошта се наведува дека генералниот директор Фадис Реџепи за време на посетата на Словенија имал состанок и со преставници од Школскиот центар за пошта, економија и телекомуникации во Љублана. Биле разгледувани можностите Македонска пошта да испрати свои вработени за дообучување и специјализација. Вработените по завршување на специјализацијата ќе бидат ангажирани за интерно обучување на другите вработени во Македонска пошта.

Претставниците на Македонска пошта по престојот во Словенија ќе го посетат Пост – експо 2017, настан организиран од Светски поштенски сојуз – УПУ во Женева.

Поранешниот турски премиер Давитоглу во посета на Македонија

Поранешниот премиер на Република Турција и пратеник од Коња Ахмет Давутоглу од денеска до 29 септември ќе престојува во работна посета на Република Македонија.

Во рамки на посетата Давутоглу, како што е најавено, ќе оствари средби со претседателот Ѓорге Иванов и со премиерот Зоран Заев.

Давутоглу на 28 септември ќе се обрати на панел дискусијата за „Перцепцијата на Република Турција во Република Македонија“, во организација на Здружението на дипломирани студенти од Турција.

На функцијата премиер на Турција Давутоглу стапува на 29 август 2014, откако Реџеп Тајип Ердоган е избран за претседател на Турција. На позицијата 26-ти премиер на Турција останува до 5 мај 2016 година кога се повлекува од позицијата лидер на Партијата на правдата и развојот АКП. Претходно од 2009 до 2014 година е министер за надворешни работи на Турција.

Конференција „Модели за финансирање на програмите за превенција на ХИВ“

 „Модели за финансирање на програмите за превенција на ХИВ и намалување на штети од употреба на дроги“, е темата на конференцијата што ќе се одржи денеска во Скопје, во организација на Здружението ХОПС – Опции за здрав живот.

На конференцијата ќе бидат презентирани европските искуства во однос на моделите за финансирање на програмите за превенција на ХИВ и намалување на штети од употреба на дроги кои ги спроведуваат граѓанските организации. Ќе се разговара и кој модел е најсоодветен за Република Македонија.

Најавено е учество на претставници од министерствата за здравство и за труд и социјална политика, експерти, здруженијата на граѓани

Евроинтеграциите во фокусот на денешната владина седница

Владата на Република Македонија денеска напладне ќе ја одржи 29. седница на која ќе го разгледа напредокот во процесот на европската интеграција и користењето на ЕУ фондовите.

На седницата се очекува да биде разгледана и реализацијата на приоритетите за влез во НАТО и реализацијата на Рамковниот договор.

На дневен ред е и информацијата за прогресот на активностите од проектот „Посета на компании“ кои имаат проблем во постапката за приватизација на градежно земјиште во државна сопственост и за остварените средби со физички и правни лица кои имаат проблеми од имотно-правен карактер.

Министрите во Владата се очекува да ги разгледаат и извештаите за работата на повеќе институции и повеќе кадровски прашања.

АВРМ ќе информира за примената на Законот за стечајци

Агенцијата за вработување денеска на прес-конференција ќе информира детално за примената на Законот за материјално обезбедување на невработените лица поради приватизација на претпријатијата со доминантна сопственост на државата.

На прес-конференција ќе присуствуваат директорката на Агенцијата за вработување Билјана Јовановска и претседателката на здружението УНИТ, Лилјана Георгиевска.

Со законот за стечајните работници којшто неодамна го донесе Собранието на Република Македонија се овозможува околу 3.000 лица да добиваат месечен надомест од по 7.596 денари, односно 34 проценти од просечно исплатената месечна нето плата минатата година. Годишно за таа намена од Буџетот на АВРМ ќе бидат обезбедени 300.816.000 денари.

Надоместот може да го користат невработени на возраст од најмалку 52 години (жени) и 55 години (мажи) со најмалку 15 години стаж во претпријатија со доминантна сопственост на државата, а таму работниот однос да им престанал по основ на стечај, ликвидација или технолошки вишок, заклучно со 30 јуни годинава. Лицата треба да имаат остварено право на паричен надомест по 1 јануари 1995 година, а по остварувањето на правото на паричен надомест да не биле вработени на неопределено време, односно работниот однос да не им престанал по нивна волја и вина.

Алексовски: Ова е чиста политичка хајка на СДСМ против мене

Актуелниот градоначалник на Крива Паланка и кандидат за градоначалник од Коалицијата за локални избори 2017 предводена од ВМРО-ДПМНЕ, Арсенчо Алексовски истакна дека кривичната пријава што е поднесена против него е, како што рече, политичка хајка и валкана игра за да се оцрни неговото име.

– Станува збор за неколку дечиња Роми и неколку дечиња Македонци од социјално-ранливи групи кои го користеле училишниот превоз, а биле оддалечени неколку метри помалку од пропишаните два километри за користење бесплатен превоз. Единствениот грев, мој и на претседателот на Советот и директорот на „Јоаким Крчовски“ е тоа што сме овозможиле овие сиромашни дечиња да користат бесплатен превоз за да учат. Ова е чиста политичка хајка и валкана игра на СДСМ пред изборите да го оцрнат моето име како кандидат за градоначалник, изјави Алексовски на прес-конференција по повод поднесената кривична пријава против него од страна на МВР, заради злоупотреба на службена должност, доносно непочитување на договор склучен со АД „Пролетер“ за превоз на ученици во општината.

Потенцира дека не е негова обврска да ја проверува оддалеченоста на домот на секој ученик до образовните институции, а секој родител, рече, потпишува изјава под морална и материјална одгооврност за користење превоз без надомест, согласно оддалеченоста на живеалиштето, 

Рече дека не биле точни ниту наводите оти општината нема договор со сообраќаен инспектор и посочи дека има склучен договор со сообраќаен инспектор од Министерство за транспорт и врски за користење општински работи.

Тој рече дека министерот за внатрешни работи Оливер Спасовски и премиерот Зоран Заев треба да се осврнат на, како што истакна, криминали направени од страна на неговиот претходник, во врска со проект за изградба на канализација во населбата Бојанов дол.