Викторија Лоба гостинка во МАК СЦЕНА на РСМ

Во денешното издание на МАК СЦЕНА на РСМ  гостинка е Викторија Лоба. За новиот сингл “Дојди” и она што следно ќе го очекуваме од Лоба слушајте во МАК СЦЕНА на РСМ.

Повторно во здружени сили Лоба и Билбилов, ја промовираа најновата песна, која е со брз и заразен ритам. Музиката и аранжманот се на Роберт, додека текстот го напиша Лоба.

Како звучи слушнете во продолжение…

На 26 мај е роден Lenny Kravitz

1964, во Њујорк е роден Lenny Kravitz, американски композитор , гитарист , тапанар , вокалист , чија дискографија изнесува 10 студиски , 5 компилирани , 8 видео албуми и 56 сингла . Тој освои Греми за “ Најдобар машки рок изведувач “ четири години по ред , од 1999 до 2002 година , рушејќи го рекордот со најмногу непрекинати победи во оваа категорија . Лени многу пати бил номиниран , и ги има добиено најпрестижните музички награди како, МТВ Видео музичките награди , Радио Музичките награди , Британските награди , и Блокбастер Ентертејмент наградите . Досега продадал 40 тина милиони албуми.

 

Вејн Руни донираше 100.000 фунти за жртвите од бомбашкиот напад во Манчестер

Фудбалерот на Манчестер Јунајтед, Вејн Руни преку својата добротворна фондација донираше 100.000 фунти за жртвите од бомбашкиот напад во понеделникот и за нивните семејства, јави Би-Би-Си.

Нападот се случи веднаш по завршетокот на концертот на американската поп пејачка Аријана Гранде во „Манчестер арената”, која е најголемата затворена сала во Европа и собира 21.000 луѓе. Од експлозијата загинаа 22 лица.

– Во животот има моменти кои ве погодуваат и парализираат. Вечерта на понеделникот беше таква… Згрозен сум што толку млади животи завршија така трагично, рече Руни.

„Македонија и Македонците во Првата светска војна”во Виена

Во Воениот музеј на Австрија во Виена, кој е еден од најстарите и најпознати музеи во оваа земја, вчера беше отворена изложбата „Македонија и Македонците во Првата светска војна” што ја подготвија Воениот музеј и Државниот архив на Македонија.

Изложбата ја отвори амбасадорот на Република Македонија Василка Попоска-Треневска, која во своето обраќање истакна дека изложбата е претставена пред австриската јавност на денот кога ги славиме македонските и сесловенски просветители, светите Кирил и Методиј кои, како што рече, своето епохално просветителско дело го започнаа токму во Македонија.

– Презентираните дела на изложбата се неми, но силни сведоштва за ужасите и злосторот што се случија на тлото на Македонија во текот на Големата војна – истакна амбасадорката Попоска-Треневска.

Во своето обраќање заменик-директорот на Воениот музеј во Виена Кристов Хачек нагласи дека во текот на војната 213.000 Македонци биле насилно мобилизирани од завојуваните страни Србија, Бугарија и Грција, да се борат за туѓа кауза и интереси.

Директорот на Воениот музеј на Македонија Александар Стојчев рече дека на изложбата се прикажани седум воени и етнографски карти, 47 фотографии и 10 документи претставени на 24 паноа, кои се сведоштва за ужасите и разурнувањата на Македонскиот фронт.

Изложбата „Македонија и Македонците во Првата светска војна“ во Воениот музеј на Австрија ќе остане отворена до 16 јуни. Претходно  оваа изложба беше поставена и во Стокхолм.

Деветта изложба на фотоклубот „Козјак“-Куманово

Во Центарот за култура „Трајко Прокопиев“ во Куманово вечер ќе биде отворена деветта клупска изложба на Фото кино клубот „Козјак“ од Куманово, насловена „Мајски салон“, на која ќе бидат претставени 40-ина дела од единаесет автори-членови на клубот.
– Многу од авторите се наградувани годинава, и дома, и надвор од државата, изјави Дејан Анѓеловски, претседател на Фото кино клуб „Козјак“-Куманово.
Кумановци ќе имаат можност да ги разгледаат и  фотографиите од кружната меѓународна изложба „3rd MALINIK Digital Circuit 2017” за која ФКК Козјак – Куманово оваа година беше избран да биде дел од организацијата.
Клубот е еден од најстарите во Куманово и функционира од 1948 година.

Зошто вкусот на пивото не тера да бараме повеќе?

Заради допаминот! Како невростимулатор, е поврзан со чувството на задоволство и среќа, но и со разните видови зависности. Експериментот со скенирање на мозокот на 49 мажи кои штотуку се напиле пиво или од спортската напивка „Гаторејд“, покажува дека вкусот на пивото произведува значително поголемо количество допамин.

Освен тоа, испитаниците признале дека потоа чувствуваат жед за уште повеќе пиво, за разлика од безалкохолниот напиток.

„Ова е првиот експеримент, којшто посочува дека вкусот на пивото сам по себе, ако се исклучи секаков опивачки ефект од алкохолот, може да предизвика повисока допаминска активност во центрите за среќа во мозокот“, се вели во истражувањето.

Утринско кафе во 10 ,со Дамир Имамовиќ и Љубојна

Дамир Имамовиќ е роден во Сараево и потекнува од семејство на традиционални пејачи на севдалинки – босанска музика исполнета со меланхолија, копнеж и мечтаење. Кaко посветен истражувач на севдахот, едукатор и продуцент, преку истражување на перцепциите на оваа етаблирана стара култура, тој создава нова култура базирана на традициите.

– Неговата скорешна соработка со продуцентот Крис Екман, американски гитарист познат по ангажманот во групата Walkabouts и соосновач на издавачката куќа Glitterbeat Records, резултира со приемчива музика која го претставува севдахот пред поширока публика. Со својата специјално изработена тамбура, Дамир создава специфичен спој од музика и стихови кои се поврзани со идејата за севдах, соопштува ОфФест.

По него во МНТ ќе настапи етногрупата „Љубојна“ со камерен концерт за промоција на новиот албум „Радио Љубојна“, кој ќе биде различен од концертите кои вообичаено ги одржуваат на големи сцени. Ќе има акустични инструменти, а со Вера Милошевска ќе има двајца машки вокали.

– Ќе се обидеме „Радио Љубојна“ да го сместиме во една убава, кадифена атмосфера, со цела топлина на звукот којшто ја носи, рече Милошевска на прес-конференција.

„Љубојна“ е меѓу најистакнатите етносостави на Балканот кој на автентичен начин го пренесува пулсот на македонското музичко битие во отворен звук за светот. Нивните музички ерупции најчесто се опишуваат како постојано менлив спој од жестока енергија, моќниот звук на дувачката секција и традиционалните македонски теми, наведува ОфФест во најавата за концертот.

Почнува 16. Оф-Фест,кој до 28 ми мај ќе понуди девет концерти

Четиридневниот 16. Оф-Фест вечер ќе почне со два концерта во Македонскиот народен театар – соло-настап на Дамир Имамовиќ од Босна, најпознатиот изведувач на севдах кој е и интернационално афирмиран, а потоа е концертот на македонскиот етносостав „Љубојна“ кои ќе го промовираат новиот, деветти албум „Радио Љубојна“.

Утре, на втората фестивалска вечер, ќе настапи групата „Бела Чао“ во која членуваат неколку познати пејачки ѕвезди од Италија, кои на концертот ќе изведат од циклусот антифашистички, револуционери, слободумни песни од 1960-тите, а по нив со звуците на фадо ќе настапи Жизела Жоао од Португалија.

Од сабота, 27 мај, ОфФест ќе се пресели во Младинскиот културен центар, каде што во Дансинг салата ќе настапи виолинистката и пејачка од Естонија Марја Нут, а по неа е настапот на корејската група „Блек Стринг“ која негува спој на традиционална и современа музика со типични корејски инструменти, како геомунго и бамбусови флејти. Саботната вечер ќе заврши со полноќен концерт во клубот „Станица 26“ на познатото диџејско дуо „Ден Сорте Сколе“ од Данска.

Последната вечер на годинашниот ОфФест во недела, 28 мај, ќе биде на африканска музика и спој на сахарски блуз и психоделичлен рок. Ќе настапи „Кинг Ајисоба“ од Гана, на кој специјален гостин ќе биде Зеа од познатиот пост-панк бенд „The Ex“, кој е продуцент на новиот албум на Ајисоба, а фестивалот ќе го затвори Нура Минт Сејмали, водечки уметник од Мавританија на интернационалната сцена, која ќе има концерт со мавритански инструменти.

Во кино „Фросина“ претходно ќе биде прикажан и документарниот филм „Every Song Has Its End“ посветен на културолошкото богатство на традиционалната музика од Мали.

Македонски дизајн на меѓународниот фестивал „Миксер“ во Белград

Изложба насловена „Помеѓу” на дизајн производи  на шестмина млади македонски брендови во период 2016 – 2017 година ќе биде поставена од денеска до 28 мај на меѓународниот фестивал „Миксер“ во Белград.

Македонските дизајн брендови, We and Nature, Rinocca, Преплет студио, Кире Стојоски, Марија Рашковиќ и Евгенија Зафировска, застапувани од страна на дизајн центарот „Јавна соба“ ќе се претстават на пет регионални дизајн фестивали и саеми во период мај – ноември годинава, а Белград е традиционално прва наша дестинација.

Македонскиот дизајн на производ е редовно застапен на меѓународната сцена преку патувачки изложби организирани од страна на дизајн центарот „Јавна соба“. Оваа соработка иницирана од страна на два клучни регионални актери („Јавна соба“ и „Мисер“) датира од пред осум години. Дизајн организациите го насочуваат своето работење кон подигнување на нивото на соработка во регионот и на тој начин го афирмираат националниот во рамки на балканскиот дизајн како препознатлив бренд во пошироки рамки.

Регионалната размена е од исклучително значење за национален и индивидуален развој на дизајн секторот во самите земји. Докажано е дека регионалната размена стимулира зголемување на продуктивност кај дизaјнерите, но и го подигнува нивото на свест кај публика и креира здрав и свесен конзумеристички пристап кон дизајн производите, кое е многу значајно за опстојување на локалните брендови. Клучниот момент за оваа размена во Македонија е фестивалот Skopje Design Week, кој ова година ќе се реализира од 22 до 25 ноември. Земја во фокус годинава е Унгарија.

Мачки и кутриња,против стрес на работа

Девет мачки јадат, спијат и слободно се движат во мала канцеларија на ИТ компанијата Ферај во Токио, што на вработените им ја олеснува стресната работа.

Шефот на компанијата Хиденоб Фукуда ја воведе таа пракса во 2000 година по барање на еден од своите вработени кога барал да ја донесе мачката на работа.

Други јапонски компании исто така овозможиле животните да претстојуваат во канцеларија за намалување на стресот и анксиозноста.

– Во компанијата Оракл Џапан, англиски овчар по име Кнади работи како амбасадор за поздрави и лекување, се наведува на веб страницата на таа компанија.

Компанијата наведува дека во канцеларијата има куче од 1991 година и дека Канди од тогаш е четврто куче кое има Твитер и Инстаграм налог.