Манчестер Јунајтед го освои трофејот во Лигата на Европа

Манчестер Јунајтед е освојувач на трофејот од Лига Европа, откако вечерва на „Френдс арена“ во Стокхолм го победи Ајакс со 2-0 (1-0) и го освои единствениот трофеј кој недостигаше во богата клупска витрина на одличја.

Фаворитот полесно од предвиденото го победи младиот Ајакс и го освои трофејот од Лига Европа, кој по три години доминација на Севиља, има нов сопственик.

МЗТ Скопје Аеродром старо – нов шампион во кошаркарската лига

Кошаркарите на МЗТ Скопје Аеродром ја освои титулата во домашниот шампионат откако во мајсторката од финалната серија на домашен терен го совладаа Карпош Соколи со 86:78.

Најдобар поединец на дуелот беше Шарлон Клоф со уфрлени 29 поени.

За тимот од Аеродром ова е 6 – та титула во домашниот шампионат.

Меси осуден на казна затвор

Врховниот суд на Шпанија ја потврди пресудата за Лионел Меси со казна затвор во траење од 21 месец, објавија денеска тамошните медиуми.

Ѕвездата на Барселона казната ја доби поради затајување данок од 4,1 милиони евра во 2007, 2008 и 2009 година.

– Таа работа им ја препуштив на татко ми и на адвокатите и не верувам дека ме излажале, не можам ниту да помислам на такво нешто, изјави Меси.

Тој ќе мора да плати и 532 илјади евра.

Меси доби по седум месеци затвор за секоја од трите години кога не пријавувал данок, а затворска казна од 15 месеци за истото дело доби и неговиот татко.

Шпанските закони дозволуваат пресудите помоли од две години да можат да се отслужат условно, без одење во затвор, па се очекува Меси и неговиот родител да останат на слобода.

Давидс: Рашфорд и Марсијал ќе го урнат Ајакс

Стокхолм вечерва (20.45 часот) ќе биде во фокусот на фудбалска Европа и домаќин на финалето во Лигата на Европа, во кое силите ќе ги одмерат Манчестер јунајтед и Ајакс.

„Јас ова финале би го нарекол ’игра на мажите против момчињата’. Мурињо има на располагање силен тим составен од прекалени интернационалци, а во Ајакс играат момчиња кои тукушто станаа полнолетни. Не е Ајакс без шанси, но, сепак, Манчестер јунајтед е фаворит. Не сум сигурен дека одбраната на Ајакс ќе има одговор за брзите напаѓачи на англискиот тим, Рашфорд и Марсијал. Тие можат да бидат клучни. Јасно е дека Мурињо ќе го обезбеди прво својот гол, а ќе бара шанса за погодок токму со брзите напаѓачи. Тоа Ајакс мора да го предводи и да смисли противигра“ – изјави Давидс.

Пионерите на Вардар го одбранија трофејот во Купот

Во драматична и неизвесна завршница, Вардар успеа да го совлада Работнички со 2:1 во финалето на пионерскиот Куп на Македонија одигран денеска во Охрид.

Избраниците на тренерот Сашо Тодоровски со пресврт го победија својот противник давајќи два гола во финишот од средбата.

Работнички поведе уште во 3. минута со голот на Тасев. Ѓорѓиески изедначи од пенал, а во судиското надополнување после една нафрлена топка од десната страна, Бериша го постави конечниот резултат.

За „црвено-црните“ ова е трета куп титула во низа во оваа категорија.

Ѓорческа елиминирана во првото коло во квалификациите на Ролан Гарос

Најдобрата македонска тенисерка Лина Ѓорческа не успеа да се пласира во второто коло во квалификациите на вториот грен слем во сезоната францускиот Ролан Гарос, откако во првата рунда загуби од Холанѓанката Кверин Лемуан.

Во натпреварот шот траеше 1 час и 42 минути, 160 – та тенисерка на ВТА листата ја совлада нашата Ѓорчеса со 2:1 по сетови 6:3, 3:6 и 3:6.

Во следното коло Лемуан ќе се сретне со 6 – та носителка во квалификациите Тајванката Кај Чен Чанг.

Бушар го пропушта Ролан Гарос

Канадската тенисерка Еужени Бушар ќе го пропушти вториот грен слем во сезоната францускиот Ролан Гарос, откако на тренинг сериозно го повредила скочниот зглоб.

Се работи за сериозно истегнување на лигаментите, повреда која што не може да се залечи толку брзо, па Бушар ќе мора да отсуствува од турнирот кој започнува на 28.мај.

Канаѓанката во моментот е на 56.позиција на ВТА – листата.

Наградниот фонд на годинашното издание на Ролан Гарос изнесува 36 милиони американски долари, а титулата во женска конкуренција ја брани шпанската тенисерка Гарбине Мугуруза.

Торес прифати нов договор со Атлетико Мадрид

Ветеранот Фернандо Торес и наредната сезона ќе го носи дресот на Атлетико Мадрид. 33-годишниот напаѓач ја прифатил понудата да остане во клубот во кој ја започна професионалната кариера уште една сезона.

На 45 натпревари оваа сезона, Торес постигна 10 гола.

Клубот потврди дека Симеоне ќе ја води екипата и следната сезона.

Почина Стефано Фарина

Еден од најдобрите судии во историјата на италијанскиот фудбал, Стефано Фарина, почина на 54-годишна возраст.

Фарина остави траен печат во италијанскиот фудбал, а судеше на точно 236 натпревари во Серија А и 17 во Серија Б. Откако се пензионира беше број 1 во судиската организација за Серија Б во Италија.

МЗТ Скопје и Карпош Соколи во „мајсторка“ за шампионската титула

Екипите на МЗТ Скопје Аеродром и Карпош Соколи попладнево ќе го играат решавачкиот петти натпревар во финалето од плејофот на домашното кошаркарско првенство.

Токму „мајсторката“ треба да го даде и одговорот на прашањето кој ќе ја освои шампионската титула за сезоната 2016/2017.

На изминатите четири натпревари домашниот терен се покажа како голема предност, па МЗТ ги доби двата меча во СЦ „Јане Сандански“, а Соколите славеа во СЦ „Борис Трајковски“.

Ќе биде ли тоа случај и во денешниот меч кој ќе се игра од 18 часот во СЦ „Јане Сандански“ останува да се види.

Инаку, по неколкуте преписки и „препукувања“ на двата клуба, кои во неколку наврати искажаа незадоволство од арбитражата на македонските судии на изминатите четири средби, МКФ реши натпреварот да го судат арбитри од Турција.

МЗТ Скопје Аеродром ќе атакува на својата шеста титула (во низа), додека Карпош Соколи кој веќе сезонава освои трофеј во Купот на Македонија ја „брка“ првата шампионска круна.