Хиршер со победа во Кицбил

Марсел Хиршер е победник на на 7 – от слалом сезонава во машка конкуренција во Светскиот куп во алпско скијање кој се возеше во австрискиот ски – центар Кицбил.

Домашниот натпреварувач до победата стигна со вкупно време од 1:17.92 стотинки, што беше за 67 стоти делови од секундата подобро од второпласираниот Британец Дејв Ридинг.

Подиумот го надополни Александер Хорошилов од Русија, со заостанување од 1 секунда и 11 стотинки зад времето на победникот.

Елиминација на Анжелик Кербер на Австралија Опен

Кај дамите првата носителка Анжелик Кербер претрпе неочекуван пораз од Американката Коко Вандевеге со 2:0 по сетови 6:2 и 6:3.

Пласман понатаму обезбедија и Павличенкова која беше подобра од сонародничката Светлана Кузњецова, Венус Вилијамс која триумфираше лесно против Мона Бартел и Гарбиње Мугуруза која ја совлада Сорана Кирстеа.

Лара Гут победничка на супервелеслаломот во Гармиш

Лара Гут е победничка на 3 – от Супервелеслалом сезонава во женска конкуренција во Светскиот куп во алпско скијање, кој се возеше во Гармиш Партенкирхен.

Швајцарката до победата стигна со вкупно време 1:17.92 стотинки што беше за 67 стоти делови од секундата подобро од второпласираната Стефани Вениер.

Подиумот го надополни Тина Вајрајтер од Лихтенштајн со заостанување од 86 стотинки од времето на победничката.

Зидан: Загрижен сум поради големиот број на повредени играчи

Тренерот на Реал Мадрид, Зинедин Зидан изјави дека е загрижен поради здравствениот билтен на своите играчи.

„Мора да се вратиме на нашето препознатливо ниво на игра. Ме загрижува фактот што имаме голем број на повредени играчи, за што мораме да бараме соодветно решение. Повредата на Модриќ не е сериозна, но онаа на Марсело е покомплицирана и останува да видиме што ќе покажат резултатите во наредните неколку дена“ – изјави Зидан.

Кирил Лазаров најдобар стрелец во досегашниот дел од Мундијалот во Франција

Кирил Лазаров е најдобар стрелец во досегашниот дел од Светското ракометно првенство во Франција. Македонскиот капитен во 6 – те одиграни натпревари постигна вкупно 50 гола, со реализација од 62 проценти.

Лазаров досега забележа и 28 асистенции со кои се наоѓа меѓу најдобрите 10 во оваа статистичка категорија.

Настапот на македонската репрезентација на Мундијалот во Франција заврши, по поразот во 1/8 финалето од селекцијата на Норвешка.

Сан Антонио подобар од Кливленд по продолженија

Изминатата ноќ во НБА лигата се одиграа 11 натпревари.

Во дербито на вечерта Сан Антонио нагости по продолженија го совлада шампионот Кливленд со 118:115. Најефикасен во таборот на Спарси беше Кавај Ленард со уфрлен 41 поени.

Во останатите мечеви: Бостон – Портланд 123:127, Детроит – Вашингтон 113:112, Шарлот – Бруклин 112:105, Атланта – Филаделфија 110:93, Њујорк – Феникс 105:107, Мајами – Милвоки 109:97, Мемфис – Хјустон 95:119, Денвер – ЛА Клиперс 123:98, Јута – Индијана 109:100 и Чикаго – Сакраменто 102:99.

Бекер: Јас овој Ѓоковиќ не го познавам

Борис Бекер даде коментар за играта на Новак Ѓоковиќ на овогодинешниот Австралија Опен.

„Цело време изгледаше незаинтересирано на теренот, а тоа не е Новак, кој го познавам. Повеќе сакам да го видам како
го крши рекетот и ја кини маицата. Не е срамно да губиш натпревари. Губел и од Мареј, Надал или Вавринка во финале на УС Опен. Од такви играчи може и да се изгуби, дури и кога Новак игра добро, но не и од Истомин. Се што се случуваше на натпреварот ми е необично и не ми се поклопува со сликата, која ја имам за Ѓоковиќ“ – изјави Бекер.

Ван Бастен: Би сакал да нема офсајд во фудбалот

Новиот член на ФИФА, Марко ван Бастен во интервју за германски „Билд“ најави дека ФИФА размислува за големи промени во правилата на игра.

„Многу ме интересира како фудбалот би изгледал без офсајд. Денеска целата екипа заедно се брани, а тогаш противниците имаат малку простор за создавање на шанси. Играта би станала поинтересна, би имало повеќе голови“ – изјави Ван Бастен.