Нема веќе билети за мечот РК Вардар – Флензбург

Македонскиот ракометен првак Вардар ќе има комплетна поддршка во борбата за завршниот „фајнал-фор“ турнир. „Црвено-црните“ на домашен терен во реванш-натпревар го пречекуваат Флензбург, во пресрет на историската шанса за пласман во Келн.

Ракометарите на Гонзалез во обидот да дојдат до историја за машкиот ракомет нема да се сами, затоа што СЦ „Јане Сандански“ е комплетно распродаден.

Во продажба има останато само уште билети за стоење, но се очекува истите да бидат распродадени до денот на натпреварот, затоа што интерсот за македонско-германскиот дуел во Лигата на шампионите е огромен.

Натпреварот меѓу Вардар и Флензбург се игра в четврток од 19.00 часот. Првиот натпревар во Германија заврши со победа на македонскиот тим од 26-24.

Берлускони избришан од историјата на Милан!

Силвио Берлускони по 31 година го предаде сопствеништвото на Милан на сомнителни бизнисмени од Кина и ја заврши веројатно најуспешната претседателска ера во историјата на фудбалот. Историјата на Милан може да се дели на периодот пред и по управувањето на Берлускони со клубот.

На крајот и контроверзниот бизнисмен го згреши моментот кога да си замине од клубот. Задоцни, бидејќи Милан во претходните години не беше ниту бледа сенка на големиот клуб кој го направи Берлускони. Но, повторно, неколкуте слаби сезони не можат да ги девалвираат сите оние грандиозни успеси кои Берлускони ги направи со Милан, сите оние големи играчи кои ги доведуваше и незаборавните моменти кои навивачите на Милан ги доживеаја со него.

Италијанските медиуми јавуваат дека од ѕидовите на тренинг центарот во „Миланело“ се тргнати сите фотографии и слики на Берлускони од златните времиња на Милан. Под водство на Берлускони, Милан освои дури пет европски титули, три светски титули, осум титули во Серија А.

Кинезите наредиле да се тргнат сите фотографии од Берлускони и Галијани со цел сите во клубот да сфатат дека ова е почеток на една нова ера и со цел новите газди да не бидат споредувани со старите. Сличен негативен пример беше виден и во соседството пред неколку години. Тогаш Рафа Бенитез го наследи Жозе Мурињо и нареди од ходниците и службените простории да се тргнат сите слики од Мурињо кој го напушти клубот по историската сезона во која беше освоена тројната круна.

Голден Стејт без Стив Кер во плеј-офот

Првиот тренер на клупата на Голден Стејт Вориорс, Стив Кер, може да ги пропушти сите натпревари на својот тим до крајот на разигрувањето поради болки во грбот.

Како што објавија медиумите во САД, Кер вели дека тој ќе се врати на клупата на тимот на следните натпревари, само доколку се подобри неговата здраствена состојба. Сегашната состојба, вели тој, не му дозволува да биде на натпреварите на „Воините“.

Кер во 2015 година имаше неуспешна операција на грбот, а потоа го пропушти половина од регуларниот дел од сезоната.

Мата се враќа побрзо од очекувањата

Фудбалерот на Манчестер Јунајтед Хуан Мата би можел да се врати побрзо од очекувањата и да му помогне на тимот во финишот од сезоната.

Последната изјава на Хуан Мата влева оптимизам кај фановите на Манчестер јунајтед дека Шпанецот сепак може да се врати пред крајот на сезоната и да ги одигра последните натпревари.

„Како што можете да замислите, овој месец беше предлог за мене поради мојата повреда. Никогаш не сум бил во ваква ситуација претходно (имав голема среќа), но вистината е дека се чувствувам многу подобро сега и се надевам дека наскоро ќе се вратам во тимот за да му помогнам во последниот дел од сезоната“ пишува Мата на својот блог.

„Се надевам дека ќе биде така бидејќи се што сакам е секогаш да бидам подготвен да му помогнам на тимот и да дадам допринос колку што можам на теренот и надвор од него“ заврши Мата со своето обраќање.

Трансферот на Гризман во Јунајтед е „завршена работа“?

Како што објави поранешниот агент на ФИФА, Винсент Родригез, трансферот на Антоан Грисман на „Олд Трафорд“ е завршена работа и наскоро сето тоа ќе биде официјалирано.

Според информациите Манчестер Јунајтед за Французинот ќе издвојат 100 милиони евра и тој после Пол Погба ќе стане најскапиот трансфер во историјата на фудбалот.

Неговиот агент Ерик Олхатс исто таа откри дека постојат бројни понуди за фудбалерот на Атлетико Мадрид.
„Веќе разговарав со неколку клубови. Манчестер Јунајтед се заинтересирани, Реал Мадрид исто така, но Ентоан не сака да си замине по секоја цена. Неговата откупна клаузула изнесува 100 милиони евра“, изјави Олхатс.

Ентоан Гризман се пресели во Атлетико Мадрид во 2014-та година. Младиот Французин на „Висенте Калдерон“ пристигна за 30 милиони евра и под водство на Диего Симеоне израсна во еден од најдобрите фудбалери на денешницата. Оваа сезона на 46 настапи за мадридскиот тим, Гризман постигна 25 гола и додаде 11 асистенции.

Интер бара заменик за Пиоли кој сигурно на крајот од сезоната си заминува

По серијата лоши резултати на италијанскиот фудбалски клуб Интер, се појасно е дека Стефано Пиоли нема да остане на кормилото на клубот по крајот на сезоната.

Па Интер работи на ангажман на нов тренер, а први желби се Диего Симеоне и Антонио Конте.

Денешното издание на “Газета дело Спорт”, објави дека Интер на двајца кандидати за прв тренер на тимот им понудил пет годишен договор вреден 55 милиони евра.

Но „Нероаѕурите“ истовремено поставиле и ултиматум, и побарале да пристигне одговор во следните 20 дена.

ИТФ го суспендираше Настасе

Капитенот на романскиот Фед куп тим, Илие Настасе е суспендиран од страна на Интернационалната тениска асоцијација (ИТФ) поради инцидентот кој го предизвика со тенисерките и судијата во плеј-офот со Британија.

Настасе во саботата исто така влезе во вербална расправија со британска новинарка, откако во петокот имаше непристоен коментар околу бременоста на Серена Вилијамс, прашувајќи „каква боја“ ќе биде детето на Вилијамс.

Реал или Барса – кој има потежок пат до титулата?

Барселона со победата над Реал Мадрид во “Ел Класико” ја направи шампионската трака во Примера исклучително интересна и драматична.

Барселона е моментално прва на табелата со 75 бода, колку што има и Реал, но со натпревар помалку, па „кралскиот“ клуб и понатаму ја има судбината во свои раце.

Екипата на Зинедин Зидан има потежок распоред и во наредните шест дена гостува на Депортиво во Ла Коруња и ја дочекува Валенсија.
Потоа „кралевите“ до крајот играат со три тима од Андалузија со Гранада на гости, Севиља дома и Малага на гости. Мадриѓаните исто така имаат и заостанат натпревар со Селта во Виго, а датумот на одигуврање сеуште не е одреден.

Реал трката за титулата, прва после 2012 година ќе му ја отежне и двомечот со Атлетико Мадрид во полуфиналето од Лигата на шампиони.Од друга страна Каталонците ја дочекуваат Осасуна, потоа му гостуваат на Еспањол, а на „Камп Ноу“ доаѓа Виљареал.
Потоа Барса патува на Канарските острови и му гостува на Лас Палмас, а на крајот игра со Еибар на домашен терен.

Милан купува фудбалер на Лацио

Италијанските медуми пренесуваат дека ѕвездата на Лацио, Кеита Балде веќе има договор со Милан и сака да се пресели на „Сан Сиро“.

Кeита викендов постигна хет-трик за само 6 минути против Палермо и е во центарот на вниманието, а медиумите тврдат дека веќе се договорил со Милан.

Кеита наводно веќе договорил четиригодишна соработка со „росонерите“, па сега останува само уште двата клуба да се договорат за отштетата.

„Кориере дело Спорт“ тврди дека претседателот на Лацио за него бара 20 милиони евра.

Баерн Минхен ќе “пазари” во Лондон

Германскиот весник „Кикер“ пишува дека Баерн Минхен на својот радар има двајца фудбалери од Премиер лигата, а и двајцата доаѓаат од клубови од Лондон – Алексис Санчез и Кајл Вокер.

Санчез има договор со Арсенал до 2018. година и би можел да прејде во Минхен за 25 – 30 милиони евра. Кајл Вокер е под договор до 2021. година со Тотенхем , а цената која ќе ја плати германскиот шампион за овој играл е 18 милиони евра соопштува „Кикер“.