Ерјавец: Стабилноста на Западен Балкан е стратешки важна за ЕУ

Стабилноста и развојот на регионот на Западен Балкан се од стратешка важност за Европската унија, порача денеска словенечкиот министер за надворешни работи Карл Ерјавец.

– Западениот Балкан и  ЕУ имаат иста цел, а тоа е државите од регионот да станат полноправни членки на Унијата. Таа цел не се промени долго време. Важно е да се биде активен и постојано да се нагласува користа од проширувањето, како за ЕУ, така и за регионот, потенцираше Ерјавец во Саарево.

Тој нагласи дека за регионот на Западен Балкан е многу важно Босна и Херцеговина да имаат добри односи со своите соседи и да презема активна улога во промоцијата на регионалната соработка.

– Светот во кој живееме бара поврзување, дијалог на сите нивоа. Политичката соработка мора да биде конкретно надградена во областа на земјоделството, инфраструктурата, културата, соработката на младите и давање на поддршка на нивната позитивна перспектива. Верувам дека Србија и Босна и Херцеговина се држави во регионот кои добро го разбираат тоа, нагласи Ерјавец, кој на последните средби на лидерите на земјите од Европската унија укажа дека е можна нов дестабилизација на Балканот.

Тој меѓутоа, истакна дека не сака да одредува само една критична точка на Балканот, бидејќи тоа не е чесно.

– Државите во регионот поради заедничкото минато и познатите историски факти се исклучително тесно поврзани. Отворените прашање се она што денес најмногу ги оптоварува меѓудржавните и меѓуетничките односи во регионот. Поради тоа посебно ме радува што токму Сараево пред неколку денови беше домаќин на самитот земјите од Западен Балкан, објасни Ерјавец.

Лавров: Подобрувањето на односите со САД не е лесно

Рускиот министер за надворешни работи Сергеј Лавров изјави дека не е лесно да се подобрат односите меѓу Русија и САД, но дека Москва е подготвена да даде се од себе за тоа да го оствари.

– Конструктивниот дијалог меѓу САД и Русија е можен во врска со кој било билатерален или меѓународен проблем, доколку се заснова на рамноправност, взаемна корист, меѓусебно почитување и ако се земат предвид интересите на другата страна без обиди за уценување или наметнување на волјата, рече Лавров за неделникот „Аргументи“.

Според него само на таа база е можно да се унапредат односите меѓу двете земји.

– Не е лесно да се достигне тоа, но како што рече претседателот Владимир Путин, подготвени сме да го сториме својот дел, рече Лавров.

Хејли: Никогаш повеќе нема да „удираме по Израел“

Американската амбасадорка при ОН Ники Хејли на годишниот состанок на американско-израелскиот комитет за јавни работи (АИПАК) изјави дека нема да дозволи „удирање по Израел“ во таа светска институција, алудирајќи на резолуцијата што беше усвоена кон крајот на минатата година, со која Израел се осудува поради изградбата на еврејски населби.

Хејли, Резолуцијата 2334 ја опиша како удар „со нога во стомак“ по сите Американци и ги предупреди другите членки на ОН дека САД ќе го возврати секој нов обид Израел да се „изолира“.

– Ние немаме подобар пријател од Израел и тоа што се случи не е само непријатно, туку и болно. Можам да кажам дека сите во ОН се плашат да разговараат со мене за Резолуцијата 2334 и сакам да им дадам до знаење дека тоа се случило, но дека веќе никогаш нема да се повтори, нагласи Хејли.

Без резултат средбата Меј – Страџен за Брегзит и за втор референдум за отцепување

Британскиот премиер Тереза Меј и шкотскиот прв министер Никола Старџен, не успеаја да ги надминат големите разлики околу Брегзит и раздружувањето на Британија од ЕУ, како и околу потребата за организирањето нов референдум за независност.

Според лондонските медиуми кои на средбата и даваат голем публицитет, разговорите меѓу „двете дами“ на британската политика поминале „крајно студено“.

Во изјавата по разговорите, Меј ја повтори својата претходна позиција дека „сега е време сите (во Обединетото кралство) да бидат обединети“, во момент кога земјата го покренува процесот на Брегзит.

Старџен, пак, остана на својата позиција да се организира нов референдум за отцепување на Шкотска од Велика Британија, само 2,5 години по првиот, што беше спроведен на 14 септември 2014 година.

-Нема рационален аргумент за одложување на вториот референдум за независност, истакна Страџен за медиумите.

Средбата организирана непосредно пред утрешното, формално покренување на Брегзит, беше организирана со цел да се надминат разликите, но и како дел од стратегија на владата во Лондон да разговара со сите делови во Британија, пред отворањето на процесот за раздружување со ЕУ.

На референдумот од 23 јуни минатата година, Шкотска со големо мнозинство гласаше против напуштањето на Унијата. Политичарите од владејачката Шкотска национална партија (СНП) кои силно агитираа против Брегзит, објаснуваат дека членството во ЕУ е од „национален интерес“ за Шкотланѓаните.

Лидерот на партијата и прв министер Старџен уште по референдумот рече дека по изгласаниот Брегзит, вториот референдум станува „неминовност“.

Подоцна, таа го поврза тоа со барањето договор меѓу Единбург и Лондон, за останување на Британија (и Шкотска) на заедничкиот пазар на ЕУ, што практично би значело „мек“ Брегзит.

Британската влада ги отфрли таквите сугестии, што за СНП и Старџен беше земено како оправдување за покренување на процесот за втор референдум за независност, но Меј на тоа гледа како на „политички игри на СНП“ и порача дека ќе го блокира барањето за нов референдум во Шкотска.

Германската агенција за труд проневерила милиони евра наменети за бегалците

Германската Национална агенција за ревизија ја обвинува Сојузната Агенција за вработување за злоупотреба на десетици милиони евра наменети за образование и учење на германски јазик на бегалците, јавува дописникот на МИА од Берлин.

Во извештајот на ревизорите, објавен денеска, се вели дека во работата на Агенцијата за вработување се откриени сериозни пропусти при извршување на работите и во менаџирањето со фондовите кои што од 2015 година биле префрлени за помош на бегалците. Во анализата која ја објавува националното радио НДР се утврдени гречки како фалсификувани сметки, лоша структура за мониторинг на процедурите и неквалитетни материјали кои што биле подготвувани за учење на германски јазик од страна на бегалците.

Во своја одбрана Агенцијата за вработување вели дека сите пронајдени грешки во работата се должат на кратките рокови од два ммесеци во кои што морале да се започната активностите поврзани со бегалците.

Само за организирање на курсеви за германски јазик за бегалците ревизорите откриле лош менаџмент на 400 милиони евра. Неправилности се пронјадени и во менаџментот финансиските сметки во кои било утврдено дека се за една услуга биле прикажувани и донации и наплатени пари од државата.

Брегзит сериозно ќе ги погоди германските-британските економски односи

Истапувањето на Велика Британија од Европската Унија ќе има значителнно негативно влијание врз германските компании, кои на долг рок ќе ги намалат своите инвестиции на островот, смета првиот човек на германската Комора за трговија и индустрија, Ерик Шварцер.

Според Швајцер, како што јави дописникот на МИА од Берлин, четири од 10 германски компании ќе имаат негативни последици од своите активности во Велика Британија, а во наредните месеци се очекува понатамошно намалување на трговијата со земјата по Брегзит.

Анализите на Комората за трговија и индустрија, во која членуваат најмоќните германски компании, покажуваат дека секоја десетта фирма веќе планира да ги повлече средствата што биле планирани за активности во Велика Британија.

Швајцер смета дека бројот на вакви фирми ќе биде многу поголем кога ќе се дознаат условите под кои Лондон ќе замине од ЕУ.

Во Унгарија стапи во сила законот за задолжително сместување на мигрантите во кампови

Од денеска во Унгарија стапи во сила законот, со кој се превидува изградба на посебни кампови за сместување на сите мигранти.

Како што јави ДПА, со овој контроверзен закон, кој предизвика многу спорови, се предвидува сите баратели на азил, вклучително и адолесцентите над 14-годишна возраст, да бидат сместени во два кампови крај унгарската граница со Србија.

Законот беше усвоен кон почетокот на месецов и предизвика остри критики од страна на Високиот комесаријат на ОН за бегалци (УНХЦР).

УНХЦР соопшти дека овој закон ќе има „ужасен ефект“ и дека ќе ги „трауматизира луѓето“.

Правните експерти оценуваат дека законот ги крши меѓународните конвенции за бегалци.

Инцијатор за усвојувањето на овој закон беше унгарскиот премиер Виктор Орбан.

Ајфеловата кула ќе добие блиндирано стакло заради заштита од терористички напади

Париските градски власти донесоа одлука Ајфеловата кула да добие заштитна облога од блиндирано стакло на две нејзини страни, заради опасноста од идни терористички напади, пренесе БТА.

Парискиот Општински совет едногласно го прифати проектот за заштита на кулата вреден 20 милиони евра. Според текстот на решението, тоа е „неопходно поради особено високата терористичка закана” во иднина.

Ќе се вметнат и заштитни прегради, како и метални и бетонски огради кај контролните пунктови. По патиштата кон и околу кулата ќе се монтира и систем за видео надзор.

Се предвидува проектот да биде готов во второто тримесечје на 2018.

Во 2015 година, Ајфеловата кула ја посетиле приближно седум милиони луѓе, а во 2016 речиси шест милиони.

Русија: Противракетниот систем на САД е закана за безбедноста на светот

Министерството за одбрана на Русија оцени денеска дека глобалното распоредување на противракетниот систем на САД претставува закана по светската безбедност, со цел да се ограничат Русија и Кина, пренесува Танјуг.

Министерството предупреди и дека распоредувањето би можело да покрене нова трка во вооружување.

Партијата ДОСТ бара поништување на изборите во Бугарија

Новоформираната партија на бугарските Турци, Демократи за одговорност, транспарентност и слобода (ДОСТ) денеска побара поништување на резултатите од вонредните парламентарни избори во Бугарија, што се одржаа во неделата.

Како што јави БТА, лидерот на ДОСТ, Љутви Местан на прес-конференција во Софија изјави дека неговата партија смета дека неделните избори не биле фер и транспарентни и дека не биле спроведени во согласност со Уставот и Изборниот закон.

– Изборите беа спроведени во услови на кршење на избирачките права на бугарските граѓани, изјави Местан.

На неделните избори ДОСТ освои нешто над 100.000 гласови или 2,86 проценти, со што не успеа да го мине изборниот праг од четири отсто неопходен за освојување пратенички мандати.

Во предвечерието на парламентарните избори, повеќе членови и приврзаници на бугарските националистички партии и организации блокираа неколку премини на бугарско-турската граница, спречувајќи автобуси со бугарски Турци, кои живеат во Турција да влезат во земјата и да го остварат своето избирачки право.

Организаторите на блокадите тврдеа дека превозот на бугарските Турци бил организиран од властите на Турција со цел тие да гласаат за партијата ДОСТ, која важи за блиска до турската владејачка Партија на правдата и развојот (АКП) на претседателот Реџеп Тајип Ердоган.

Инаку, „дост“ на турски јазик значи „пријател“.