Тереза Меј му објави војна на теророт во Велика Британија

Над илјада британски војници опремени со најсовремено оружје, се распоредени низ улиците на Лондон и другите градови во Велика Британија, како една од мерките на Владата на Тереза Меј во „војната против теророт“, што таа ја покрена по терористичкиот напад во понеделникот доцна вечерта во Манчестер.

Војската е распоредена како дополнување на полицијата, иако засега не се знае, која и каква ќе биде улогата на армиските сили во безбедносната ситуација која се означува како „критична“, што значи дека Велика Британија се наоѓа во „непосредна опасност“ од нов терористички напад, кој би можел да се случи секој момент.

Војниците засега ја чуваат зградата на британскиот Парламент, кралската Бакингамска палата, Даунинг стрит 10, каде е седиштето на Владата и службената резиденција на британските премиери, но се размесетени и на сите значајни локации и местата каде се собираат многу луѓе.

Од безбедносни причини, забранети се сите посети на зградата на Парламентот, суспендирани се традиционалните смени на гардистите пред кралската палата во центарот на Лондон, а откажани се и „шампионските паради’ на фудбалерите на Челзи низ лондонските улици и на Манчестер Јунајтерд по освојувањето на Европскиот куп.

Објавувањето „војна на теророт“, со прогласување критично ниво на закана од терористички напад е трет ваков случај во поновата историја на земјата.

Првпат тоа се случи во 2006 година, кога беше откриен заговор за планирано соборување на патнички авиони на летовите од Европа кон САД и Канада.

Вториот случај кога безбедносната ситуација беше прогласена за критична, беше во летото во 2007 година во текот на бомбашкиот напад врз аеродоромот во Глазгов, откако истиот ден беше спречен и терористички напад во центарот на Лондон.

„Војна против теророт“ е термин што беше создаден во САД, по терористичкиот напад од 11 септември 2001 година од тогашниот претседател Џорџ Буш, а во Велика Британија ревитализиран од премиерот Тони Блер, пред и по воената интервенција врз Ирак, со која беше соборен режимот на Садам Хусеин.

Меј тогаш како пратеник на конзервативците со повеќемина колеги, сега нејзини министри, остро се спротивставуваа на терминот „војна со терористите“, тврдејќи дека е контрапродуктивен и дека само создава непријатели на Велика Британија, уште повеќе загрозувајќи ја нејзината безбеднсот.

Според медиумите во Лондон, сега токму Меј покрена своја „војна против теророт“, оправдувајќи ја со „грижата за безбедноста на Британците“, како што тоа пред неа пред 14 години го објаснуваше и Блер.

За разлика од тогаш, Меј сега се наоѓа во екот на изборната кампања за изборите од 8 јуни, па медиумите анализираат што друго премиерката може да направи, откако нареди војската да излезе на британските улици.

Една можност е да се прогласи вонредна состојба, како што тоа направи Франција по терористичкиот напад од 13 ноември 2015 година, кога беа убиени 130 лица.

Но, во Велика Британија последна вонредна состојба е прогласена уште во 1973 година, од тогашниот премиер Едвард Хит.

Во годината кога Велика Британија влезе во ЕУ, Хит прогласи вонредна состојба, не поради терористичка закана, туку поради масовниот штрајк на рударите што ја блокираше земјата. Хит тогаш ја повика војската да помага во одржувањето на безбедноста заедно со полицијата и за да не дојде до колапс на земјата.

Туск: ЕУ и САД имаат несогласувања во однос на Русија

Претседателот на Европскиот совет, Доналд Туск по средбата со американскиот претседател, Доналд Трамп изјави дека не е сосема уверен дека денес може да каже дека САД и ЕУ имаат заеднички став за Русија.

– Во однос на Украина изгледа дека сме на иста позиција, нагласи тој и додаде дека некои прашања остануваат отворени – за заштита на природата и за трговијата.

Тој истакна дека ЕУ и САД имаат усогласени ставови во однос на прашањето за борба против тероризмот.

– Главната порака што сакам да ја упатам е дека она што ги прави нашата соработката и пријателство длабоки се заеднички вредности на Западот – слободата, човековите права, почитување на човечкото достоинство. Најголемата задача денеска е обединување на слободниот свет околу тие вредности, а не само околу интересите, рече Туск.

Трамп во Брисел ги почна разговорите со лидерите на ЕУ

Американскиот претседател Доналд Трамп денеска ги почна разговорите со лидерите на Европската Унија во Брисел, каде, инаку, присуствува на самитот на НАТО.

Разговорите тој ги почна со претседателот на Европскиот совет Доналд Туск, претседателот на Европската комисија Жан Клод Јункер, и со други официјални претставници.

Трамп јавно повикуваше на распуштање на Алијансата кога Обединетото Кралство гласаше за излез од Европската Унија, минатото лето, пренесуваат американските медиуми.

Во рамки на своето прво патување по светот, Трамп пред Брисел, престојуваше во Саудиска Арабија, Израел и Ватикан.

Челниците на НАТО, инаку, се собираат на самити секоја втора година, но овој состанок е исклучок, а повод е отворањето на новото седиште што се наоѓа точно наспроти старото седиште во бриселското предградие Евер, наведува Хина.

Белгиската полиција очекува денеска во Брисел да има околу 10.000 демонстранти, кои се собираат под слоганот „Трамп не е добројден“, па затоа се предвидени строги безбедносни мерки со голем број полицајци и војници.

Самитот се сведува на работна вечера на шефовите на држави и влади на земјите членки, па и затоа не може да се очекува посодржајна расправа, а секој од лидерите ќе има по три минути за расправа.

Пред работната вечера  ќе бидат откриени два споменика што се наоѓаат пред новата зграда – во спомен на падот на Берлинскиот ѕид и на терористичките напади врз САД од 9 септември 2001 година, кога НАТО првпат во својата историја го активира Член 5 од Северноатлантскиот договор, што вечи дека нападот врз една членка на Алијансата претставува напад врз сите.

Мустафа до Могерини: Косово е посветено на ЕУ интеграциите

Косовскиот премиер во заминување Иса Мустафа тврди дека ја уверил високата претставничка на Европската унија за надворешна политика и безбедност Федерика Могерини дека Косово е посветено на европските интеграции, пишува денеска приштинскиот весник „Бота сот“.

– И покртај влегувањето во изборниот процес, ќе продолжиме да го следиме патот, кој води кон европската перспектива, рече Мустафа по состанокот со Могерини.

Тој додаде дека како лидер на Демократскиот сојуз на Косово ќе продолжи да ги поддржува процесите, кои се покренати за време на неговиот мандат како премиер, како што е спогодбата за демаркација со Црна Гора, формирање на Заедницата на српски општини и дијалогот со Белград.

– Нема друго решение, мораме да обезбедиме примена на договореното и да ги исполниме постигнатите договори, рече Мустафа по билатерлниот состанок со Могерини.

Тој изјави дека со неа разговарал и за формирање на Заедницата на српските општини, дијалогот со Белград и визната либерализација.

Мустафа синоќа присуствуваше на неформалната вечера, која за премиерите од Западен Балкан ја подготви Могерини во Брисел.

НАТО се придружува на коалицијата против Исламска држава

НАТО, на денешниот самит, на кој ќе присуствува и американскиот претседател Доналд Трамп, ќе се придружи на коалицијата против Исламска држава, предводена од САД, изјави генералниот секретар на Алијансата Јенс Столтенберг.

– Тоа ќе испрати силна политичка порака за посветеноста на НАТО кон борбата против тероризмот, истакна Столтенберг.

Шефовите на држави и влади од НАТО на средба во Брисел

Шефовите на држави и влади на земјите од НАТО денеска ќе имаат еднодневна средба во Брисел, на која по првпат ќе учествува и црногорскиот премиер, Душко Марковиќ, чија земја во јуни и официјално станува членка на Алијансата.

Заседанието ќе биде одбележено и од присуството на новоизбраните претседатели на САД, Доналд Трамп, и на Франција, Емануел Макрон, кои првпат ќе се сретнат со своите сојузници од Алијансата. Средбата почнува во попладневните часови и ќе заврши  малку пред полноќ.

Меѓу темите на средбата ќе бидат прашањата за споделениот товар за активностите на Алијансата, постигнувањето на целта за трошоците за одбрана-еднакви два проценти од БДП на државите, разработка на национални планови за реализација на овие цели.

НАТО ќе ги добие и клучевите од своето ново седиште во Брисел, претседателот Трамп ќе открие споменик посветен на чл. 5 од Вашингтонскиот договор, а германскиот канцелар Ангела Меркел ќе открие споменик со парче од Берлинскиот ѕид.

Новиот дом на НАТО ќе биде отворен врз терен, што претходно бил бојно поле, а денеска станува симбол на соработката и дијалогот меѓу сојузниците, одбележува генералниот секретар на пактот Јенс Столтенберг. Тој прецизира дека на местото на новото седиште при изградбата биле откриени четири неексплодирани бомби од двете светски војни.

Се очекува сојузниците да го изразат единството против заканата од тероризмот. Се предвидува да се разгледа идејата за приклучување на Алијансата кон меѓународната коалиција против терористите од Исламска држава, без да се разгледа испраќањето војници на фронтот, туку со намера за потесна соработка на разузнавачките, воените и силите на правдата.

Албанија ја напуштаат приближно онолку лекари колку што дипломираат

Во последните две години Албанија ја напуштаат прближно онолку лекари колку што дипломираат. Овој алармантен податок го изнесе Ректорот на Универзитетот за медицина во Тирана, Арбен Ѓата, хирург, според кого, се помал е и бројот на лекари на специјализација.

– Споредено со претходните години, се помал е бројот на лекарите кои специјализираат на некоја гранка од медицината. Тоа секако е последица на фактот што голем број лекари ја напуштија Албанија. Многу набрзо ќе се соочиме со голем проблем во здравстениот систем, бидејќи бројот на оние кои ја напуштаат земјава, во последнте две години е приблжно идентичен со бројот на ново дипломираните лекари, изјави за телевизјата Ора њус, ректорот Ѓата.

Во серијата емисии посветени на недостигот, посебно на лекари специјалисти, по загрижувачката состојба во регионалните болници во Лушња и Берат, синоќа беше прикажана состојбата во Фиер, каде како и во другите болници, дел од недостигот на лекари ги пополнуваат со веќе пензионирани.

– Во Регионалната болница во Фиер имаме шест педијатри, од нив тројца веќе пензионирани, кои со голем напор ги задржуваме за да можеме да одговориме на потребите. Замислете, имаме само еден ренгенолог, ни недостигаат двајца лекари реаниматори, потоа гинеколози, зашто тројца од четворица колку што работат кај нас треба да заминат во пензија, а ни недостига и кардиолог, вели заменик директорот на Регионалната болница во Фиер, Андреа Долаку.

Одливот на лекари и средномедицски кадар во Албанија е присутен со години наназад и од година во година станува се позагрижувачка појава. Причина се подобите услови за работа и секако многу повисоките плати.

НАТО ќе се приклучи кон коалицијата предводена од САД во борбата против ИД

НАТО ќе се приклучи кон коалицијата предводена од САД во борбата против Исламска држава, со што ќе биде задоволено едно од клучните барања на американскиот претседател Доналд Трамп, а со тоа Алијансата посериозно ќе се ангажира во борба против тероризмот, изјави денеска дипломатски извор.

– Постојаните претставници на земјите членки на НАТО тукушто донесоа одлука. Допрва треба да биде официјално објавена на утрешната средба на врвот на Алијансата, додаде тој.

Во Триполи уапсен помалиот брат на напаѓачот од Манчестер

Помалиот брат на напаѓачот од Манчестер, Хашем Абеди е уапсен во Триполи под сомнеж за поврзаност со џихадистичката група Исламска држава, изјави портпаролот на либиските сили за борба против тероризмот, Ахмед Бин Салем.

– Хашем, кој е роден во 1997 година, е уапсен синоќа од силите „Рада“, истакна Бин Салем.

Претходно, нивниот татко Рамадан Абеди изјавил дека неговиот 22-годишен син Салман, кој е осомничен за извршениот напад во Манчестер, не бил поврзан со исламисти и немал ништо заедничко со нападот во „Манчестер арената“, во кој загинаа 22 лица, а над 100 се повредени.

– Ние не веруваме во убивање на невини луѓе. Не сме такви, истакнал Рамадан, кој тврди дека разговарал со Салман пред пет дена и дека тој му звучел сосема нормално и се подготвувал да ја посети Саудиска Арабија, од каде планирал да дојде во Либија, за да биде заедно со семејството за време на светиот месец Рамазан.

Рамадан Абеди побегнал во 1993 година од Триполи, откако безбедносните сили на режимот на Муамер Гадафи издале наредба за негово апсење. Подоцна тој побарал политички азил во Велика Британија. Рамадан моментно раководи со Централната управа на безбедносните сили во Триполи.

Поранешниот висок претставник на либиските безбедносни сили, Абдел Басит Харун изјави денеска дека Рамадан наводно бил член на либискиот огранок на Ал Каеда. Тој тврди дека лично го познавал таткото на бомбашот самоубиец од Манчестер и дека Рамадан бил член на Салафи џихади движењето, кое е најекстремен дел на селафистите, од кои се создадени Ал Каеда и ИД. Според него, Абеди, познат под името Абу Исмаил, се вратил во либискиот град Триполи.

Британската полиција трага по соучесници, кои можеби му помогнале на Салман да ја изработи бомбата, со која го изврши нападот во понеделникот за време на концертот во Манчестер.

– Прашање е дали дејствувал сам или бил дел од мрежа со други луѓе, кои сакаат да извршуваат убиства. Врз тоа е насочена истрагата. Загрижувачки е што може да има и други луѓе, кои му помогнале да ја направи бомбата. Изработката на ваков вид бомба бара посебно ниво на стручност и компетентност, тврдат анонимни полициски извори.

Анкета: Партијата на Макрон ќе освои мнозинство на парламентарните избори во Франција

Партијата на францускиот претседател Емануел Макрон ќе освои приближно една третина од гласовите на парламентарните избори во јуни и ќе си обезбеди солидно мнозинство, покажува анкетата на Француаскиот институт за истражување на јавното мнение и консултантската компанија „Фидусијал“ за списанието „Пари мач“, пренесуваат британските медиуми.

Партијата на Макрон, „Републиката напред“, ќе освои 31 процент од гласовите во првиот круг од изборите на 11 јуни. При последната анкета, што беше направена на 4-5 мај, пред Макрон да биде избран за претседател, прогнозите беа дека партијата ќе освои 22 проценти.

Конзервативната партија „Републиканци“ ќе освои 19 проценти, крајнодесничарскиот Национален фронт ќе освои 18 проценти, крајнолевичарската партија „Непокорна Франција“ ќе осволи 15 проценти, а Француската социјалистичка партија едвај седум проценти.

Тоа ќе биде многу под освоените 29,5 проценти на социјалистите на минатите парламентарни избори од 2012 година, кои на нив и нивните сојузници им обезбедија мнозинство во Парламентот.