Груевски изврши увид на градежните работи на новиот стадион во Битола

Во тек е изградбата на новиот фудбалски стадион во Битола. Лидерот на ВМРО-ДПМНЕ, Никола Груевски денеска изврши увид на градежните работи.

Битолскиот градоначалник Владимир Талески информираше дека северната и јужната трибина ги гради Општината, додека тревата, осветлувањето и трибините ќе ги гради Фудбалската Федерација на Македонија. Општината издвоила 5 милиони и 430 илјади евра за северната трибина, додека ФФМ донирала 800 илјади евра плус трибините.

-Теренот е направен од ФФМ, а ќе се направат трибините зад головите, односно исток и запад и осветлувањето, вели Талески, додавајќи дека вкупниот капацитет на стадионот ќе биде некаде околу 12.000 гледачи.

Северната и јужната трибина ќе бидат со капацитет од по 4.000 гледачи, а се правени по европски стандарди, односно за меѓународни натпревари.

-Идејата на ФФМ е меѓународни натпревари да се одржуваат тука, со осветлувањето, со трибините, со тревата, да може од следната година да се одржуваат меѓународни натпревари, истакна Груевски.

Потсети дека тоа беше големо барање на битолчани.

-Ова беше големо барање на битолчани. Особено на навивачите, на онаа редовна група, вели Груевски.

Како што вели Груевски, при разговор со претседателот на ФФМ му било речено дека работата од страна на Федерацијата треба да биде готова кон крајот на годината. Според Талески, пак, изградбата на северната трибина треба да биде готова исто така, кон крајот на годината, но потоа ќе се работи на ентериерот.

Градоначалникот информираше и за реконструкцијата на Спортската сала „Младост“.

-Ја реконструираме и Спортската сала „Младост“. Таму го проширивме игралиштето и ги направиме сите димензии по стандард. Го сменивме целиот паркет, поставивме нови столчиња и семафор. Исто така, греењето го средивме со еден прекуграничен проект, имаме пелет линии. Таа комплетна ќе биде реконструирана, вели Талески, додавајќи дека во вториот дел од реконструкцијата ќе се средат соблекувалните, тоалетите, што како што вели, практично тоа ќе биде како нова спортска сала.


Финишира реконструкцијата на регионалниот пат Битола -Ресен -Буково

Лидерот на ВМРО-ДПМНЕ Никола Груевски заедно со Министерот за транспорт и врски Владо Мисајловски денеска направи увид на реконструираниот регионален пат Битола-Ресен-Буково.

Регионалниот пат Битола-Ресен-Буково е во завршна фаза, а асфалтирана е целата делница од 27 километри.

Инвестицијата е вредна 5,9 милиони евра и до пуштање на патот останува само поставувањето на сигнализацијата.

Груевски: Македонија веднаш да добие покана за НАТО и да почне преговори со ЕУ

Да се упати покана на Македонија за членство во НАТО веднаш и да се започнат преговорите за членство во ЕУ, побара денеска лидерот на ВМРО-ДПМНЕ Никола Груевски.

– Македонија предолго се држи надвор од НАТО и од Европската унија. Предолго Грција не дозволи да започнат преговорите со ЕУ и да ја добиеме поканата за членство во НАТО. Уште во 2008 година Македонија ги исполни условите за да ја добие поканата за НАТО, а тоа сите граѓани го знаат. Тоа се стопираше на Самитот на НАТО, а следната година веќе дојде препораката од Европската комисија до Европскиот совет за започнување на преговорите за полноправно членство во Европската унија. Оттогаш поминаа 7-8 години како Македонија се држи надвор од НАТО. Тоа не е добро, рече Груевски, одговарајќи на новинарско прашање по посетата на општина Ресен.

Тој апелираше до членките на НАТО и ЕУ да ги започнат преговорите согласно договорот од 1995 година според кој, како што рече, нема никаква пречка да се започнат преговорите, а прашањето со јужниот сосед да се решава во од.

Најдобро и најкорисно е, како што рече, особено по оваа политичка криза што се случи во Македонија да се најде начин и сили да се разговара и со соседна Грција.

– Да се упати поканата на Македонија за членство во НАТО веднаш, годинава и да се започнат преговорите за членство во ЕУ. Тоа ќе даде нова сила, нова енергија и верувам дека многу од негативните процеси што се случија во минатиот период немаше да се случат доколку во 2008 година, кога ги исполнивме сите услови за членство во НАТО, ја добивме поканата, станевме членка на НАТО и доколку во 2009 кога Европската комисија првпат кажа дека сме ги исполниле условите за да ги почнеме преговорите и ги почневме, работите ќе одеа во една подобра насока, рече Груевски.

Поучени од сето тоа, како што рече, се надевам дека и земјите членки на НАТО и земјите членки на ЕУ ќе дадат можност за да се започнат веднаш годинава преговорите. Потсети дека нема никакви пречки според договорот од 1995 година. Тој, како што рече, е меѓународен договор потпишан под покровителство на Обединетите нации, додека прашањето со Грција потоа во една помирна атмосфера може да се продолжи да се разговара и да се бараат решенија прифатливи за двете страни.

Целосно реконструирана Клиничката болница во Битола

Завршена е темелната реконструкција на Клиничката болница во Битола која опфати целосна промена на покривот, фасадата и прозорците. Инвестицијата е вредна 107 милиони денари.

Ова денеска го истакна вицепремиерот и министер за здравство Никола Тодоров кој заедно со лидерот на ВМРО-ДПМНЕ Никола Груевски извршија увид во реконструкцијата на Клиничката болница во Битола.

Тодоров информира дека реконструкцијата ќе овозможи сериозна енергетска ефикасност на болницата и заштеди кои ќе се движат од 7 до 9 милиони денари годишно, средства кои болницата ќе може да ги искористи за сопствен развој.

Ова е прва темелна надворешна реконструкција на болницата која што е изградена во 70-ите години од минатиот век.

– Ние имавме план и во Програмата ни беше предвидена и комплетна реконструкција на внатрешноста на болницата или 635 милиони денари и подигнување на стандардот. Собите да бидат со помал број кревети, да има тоалет во секоја соба, како и реновирање на операциските сали. Тоа требаше да почне во 2018 година, прва фаза, а втората фаза во 2020 и со тоа требаше комплетно да се затвори инвестицијата, рече Тодоров.

Тој информира дека досега во оваа болница се вложувало во инфраструктура, опрема и кадар. Во болницата има набавено нова медицинска опрема во вредност од над 6 милиони евра, меѓу кои се ангиограф за интервентна кардиологија, апарат за компјутеризирана томографија, апарат за магнетна резонанца, рендген апарат во вредност од околу 100 илјади евра, гинеколошки ултра-звучен 4Д ехо апарат, инкубатори за недоносени новороденчиња…

– Од 2012 досега имавме сериозни кадровски зајакнувања во болницата. Од 2012 досега се примени 250 лица, од кои 46 доктори, а останатите се сестри, болничари, лаборанти, истакна Тодоров.

Груевски интересирајќи се за услугите кои им ги овозможува болницата на пациентите констатира дека пациентите за зрачна терапија повеќе нема да мора да одат или да доаѓаат во Скопје. Тој изрази задоволство од комплетното надворешно реновирање на болницата, од новата опрема и новиот кадар.

– Овде одлично се одвиваат работите. Готов е проектот и за внатрешна реконструкција, а тоа е многу важно. Надворешната е завршена, опремата е тука, кадарот е зајакнат и по квантитет и по квалитет во смисла на обуки и специјализации. Педесет лекари се отидени во странство во сите центри, во Европа и во Америка. Објектот за радиотерапија е завршен, донесен е апаратот и треба да се инсталира деновиве, рече Груевски.

Според него, се работи за сериозно зајакнување и издигнување на друго ниво од она што беше претходно, пред 7-8 години.

Тодоров посочи дека се очекува за девет месеци да почне со работа аксцелераторот.

Тодоров информира дека 23 доктори во моментов се пратени на специјализација, од кои пет во странство, а има и 10 од оние кофинансирани специјализации со кои овозможуваме трансфер на оние од приватна во државна специјализација и тоа, како што рече, сериозно ќе го зајакне кадарот на болницата на среден рок во болницата, односно ќе овозможи стабилен развој на болницата.

НБРМ прогнозира раст од 2,5 проценти на македонската економија

Народната банка на Република Македонија во априлската проекција прогнозира раст од 2,5 проценти на македонската економија за годинава по што би следело забрзување на 3,2 процента во 2018 година, информира денеска на прес-конференција гувернерот на НБРМ Димитар Богов.

НБРМ има непроменети очекувања за нивото на инфлацијата споредено со октомври и очекува забрзување на растот на цените, односно инфлација од 1,3 проценти годинава и 2 проценти догодина.

НБРМ очекува стеснување на дефицитот на тековната сметка во периодот 2017-2018 година, понизок дефицит на салдото на стоки и услуги, благ раст на секундарниот доход, како и проширување на дефицитот кај примарниот доход. За годинава се проектира раст на депозитите кај банкарскиот систем од 4,2 процента, како и кредитен раст од 5,6 проценти.

Банкарскиот систем, според НБРМ, е и натаму стабилен, ликвиден и високо капитализиран.

– Клучни претпоставки на априлските проекции се задржување на здравите фундаменти на домашната економија, продолжените негативни ефекти од политичката криза врз однесувањето и довербата на потрошувачите и инвеститорите, како и претпоставката за постепено разрешување на кризата во текот на годинава, стабилизирање на амбиентот и исцрпување на неповолните ефекти до крајот на годината, наведе Богов.

Појаснувајќи ја промената на ризиците помеѓу двете проекции, гувернерот Богов рече дека неповолните ризици во овој циклус проекции се поизразени споредено со октомври. Тие се главно  поврзани со домашните фактори од неекономски карактер, односно со политичката криза која што продолжи и на почетокот на 2017 година спротивно на октомвриските очекувања за нејзино разрешување, како и со надворешното опкружување поврзано со неизвесноста од последиците од излезот на Велика Британија од ЕУ…

Како поволни ризици во најновото сценарио на Централната банка се наведени посилните позитивни ефекти од структурните промени во извозниот сектор на домашната економија, а во глобални рамки по брзото закрепнување на светските цени на примарните производи, натамошно подобрување на финансиските услови и фискален стимул во САД.

Ји ги осуди повиците за Голема Албанија, ги смета за дел од предизборието

Американскиот заменик помошник државен секретар за европски и евроазиски прашања Хојт Ји ги отфрли изјавите и повиците на балканските политичари за создавање Голема Албанија, велејќи дека дел од нив се дадени во контекст на предизборни кампањи и не се одраз на желбите на албанските политичари во регионот.

Во интервју за порталот Европски Западен Балкан, во врска со Македонија, Ји изјави дека тој тесно ги координирал своите активности со Европската Комисија и со европската дипломатска служба на Федерика Могерини, за да се издејствува давање на мандатот за состав на Влада на лидерот на СДСМ Зоран Заев.

– Не верувам дека постои сериозно движење за создавање на Голема Албанија или желба кај албанското население, дали е тоа во Македонија, Црна гора или Албанија, за обединување во нова држава. Официјалниот став, и јас верувам, искрениот став, на политичките партии од Македонија, Црна Гора, Косово и Албанија е да се интегрираат во Европската Унија и што поскоро во НАТО, и тоа во рамките на државите каде што сега живеат, а не со промена на границите или преку некој голем национален ентитет. Знам дека има одредена реторика, која јас сметам дека е неодговорна и провокативна, од одредени политичари во регионот. Тоа не беше конструктивно и создаде сомничавост. Сметам дека овие слогани и пароли не треба да се гледаат надвор од контекстот на предизборните кампањи во кои беа дадени. Не сакам со ова да ги оправдам овие повици или да нудам објаснување за нив. Ние и јавно и приватно ја осудивме ваквата реторика. Важно е и да не се реагира прекумерно и да не ги земаме буквално изјавите дадени од политичари кои се во кампања, изјави Ји, додавајќи дека секој обид за промена на границите би бил сериозен удар за обидот на таа држава да влезе во Европската Унија. Најосудувана ваква изјава беше коментарот на албанскиот премиер Еди Рама, за порталот Политико, дека доколку нема европска перспектива за Балканот, Албанија може да се обедини со Косово.

Во врска со Македонија, Ји изјави дека се координирал со Могерини и со Европската Комисија, како што правел и во врска со паралелната политичка криза во Албанија. Ји беше запрашан и за тоа колкаво е американското влијание за начинот на кој се одвиваат политичките кризи во двете држави, и дали е тоа поголемо од влијанието на Европската Унија.

– Би сакал мојата држава да имаше успеси или влијание колку што медиумите ни придаваат. Јас тесно соработував со Европската Комисија и со Европската Надворешна Акциска Служба. Малку се темите на Балканот во кои САД не ги координира своите активности со нашите пријатели во Брисел, токму затоа што делиме заедничка цел – сакаме да го видиме регионот интегриран во Европа и во европските институции. Успехот дојде затоа што лидерите на државите беа способни да донесат тешки одлуки, дали беше тоа одлуката на претседателот Иванов во Македонија да го даде мандатот на коалиција во Собранието која има мнозинство за да може да формира Влада, или на опозицијата во Албанија која презема храбар чекор и реши да учествува на изборите, како и на премиерот Рама кој покажа флексибилност потребна да се убеди опозицијата. Ова е пред се во полза на Албанија, ситуацијата во Албанија, и на Македонија, на народот на Македонија. Заслугата е на лидерите на овие држави, а ние сме среќни што помогнавме, изјави Ји.

Пожар во Скопје, опожарени две бараки

Две бараки на улицата „Зендел Џемаил“ биле опожарени ноќеска. Во пожарот нема повредени, причинета е само материјална штета.

– Едната барака е сопственост на Ѓ.В. (49) и таа била целосно изгорена, а втората е сопственост на Е.А. (28), која била делумно опожарена. Повредени лица нема, а од страна на Бригадата за противпожарна заштита пожарот бил изгаснат. Увид ќе се врши во текот на денешниот ден, соопшти МВР.

Случајот рано изутринава, во 3:42 часот, во ЕИК Скопје го пријавил дежурен од Бригадата за противпожарна заштита.

Се ревитализира дистрибутивната мрежа на топлинска енергија, измени на сообраќајот кај Веро Џамбо

Балкан енерџи груп утре продолжува со ревитализација на главниот топловод на потегот позади Народната банка на Република Македонија до трговскиот центар Веро – Џамбо во општина Центар, поради што ќе биде изменет сообраќајот на булеварот „Кузман Јосифовски – Питу“, соопштија денеска од БЕГ.

– Согласно оперативниот план за реализација на оваа инвестиција, почнувајќи од утре (петок 26 мај 2017) попладне ќе започнат градежни активности преку булеварот „Кузман Јосифовски – Питу“, поради што сообраќајот на оваа собраќајница ќе биде под изменет режим. Секторот за сообраќај на Град Скопје има издадено соодветна дозвола за овој зафат, којшто ќе заврши во најкраток можен рок, велат од БЕГ.

Оттаму информираат дека работите на овој дел од топловодот биле одложени во период од седум дена заради потребата да се извршат дополнителни подготвителни работи на теренот, предизвикани од околности кои не можеле да се предвидат.

– Реализацијата на оваа инвестиција е од огромно значање за потрошувачите на општините Центар и Карпош, особено корисниците од населбите: Центар, Капиштец, Козле, Водно и Карпош, бидејќи со модернизација на мрежата ќе добијат уште посигурна и навремена испорака на топлинска енергија. Таа е дел од инвестициската програма на Дистрибуција на топлина Балкан Енерџи за 2017 во чии рамки се предвидени низа активности за модернизација и ревитализација на дистрибутивната мрежа во Скопје. Истовремено преку овие инвестиции се зголемува енергетската ефикасност на дистрибутивниот систем за топлинска енергија, што е значајно и за подобрување на квалитетот на животната средина во Скопје, велат од компанијата.

ВМРО-ДПМНЕ: Граѓаните оправдано се плашат за реализацијата на тиранската платформа

ВМРО-ДПМНЕ денеска во соопштение наведува дека граѓаните оправдано се плашат дека  претседателот на СДСМ Зоран Заев „е подготвен да ја реализира тиранската платформа, во надеж дека од позиција на власт ќе се спаси од кривичен прогон за кривични дела кои ги извршил“.

Според ВМРО-ДПМНЕ, секој ден коалициските партнери на СДСМ излегувале со изјави дека не се откажуваат од тиранската платформа, но ниту Заев ниту партијата ги демантираат таквите изјави.

– Зар вака криминогениот СДС ќе ги брани националните и државните интереси на Република Македонија?, прашува ВМРО-ДПМНЕ од каде бараат одговор и за тоа „кој ги манипулира гласачите и народот, Алијансата за Албанците или СДСМ.“

– Дали лаже Таравари кога вели дека побарале двојазичноста да се реализира експресно и Заев се согласил со тоа или лажеше Заев кога ја потпиша гаранцијата со која ја отфрли тиранската платформа, прашува ВМРО-ДПМНЕ.

Соопштува дека и понатаму ќе остане во функција на граѓаните, штитејќи ги нивните интереси и истакнува дека „СДСМ треба да знаат дека за поткопувањето на унитарноста на државата се одговара пред законот, но и пред граѓаните на Република Македонија на избори, од кои упорно бегаат“.