Претставата „Име“ театарот „Комедија“ на „Охридско лето“ ќе ја игра на затворена сцена

Поради неповолните временски услови театарската претстава „Име“ на НУ „Театар Комедија“ закажана за утревечер на програмата на „Охридско лето“, наместо на отворена сцена на Предворјето на Света Софија ќе се игра на Големата сцена на Центарот за култура „Григор Прличев“ во Охрид.

Истовремено во соопштението од Фестивалот „Охридско лето“ се наведува дека наместо во предвидениот термин од 22:30, почетокот на претставата е презакажан за од 21 часот.

Одлуката за преместување на местото на изведбата на претставата „Име“ е донесена поради временски неприлики невообичаени за овој период од годината, ниските температури, ветерот и можноста за врнежи од дожд.

Инаку на програмата на 57-то издание на „Охридско лето“покрај театарската претстава за утре е предвиден и солистички концерт на италијанскиот виолинист Франческо Дорацио, што ќе се одржи на сцената во Катедралната црква „Света Софија“ по почеток од 20:30 часот.